Turkiyya da Aljeriya sun sanya hannu kan yarjejeniyar sufurin teku

Turkiyya da Aljeriya sun sanya hannu kan yarjejeniyar sufurin teku

Shugaban Kasar Aljeriya Abdulmajid Tebbun ya bayyana cewa, kasarsa da Turkiyya sun sanya hannu kan yarjejeniyar kasuwanci da safarar kayayyaki a teku.

Jaridar Kasa ta Tukiyya a ranar Alhamis din nan ta buga yarjejeniyar da Shugaban na Aljeriya ya sanya hannu a kai a ranar 5 ga Mayu, kuma ta kunshi samar da jiragen ruwa, gyara su da gina tashoshin jiragen ruwa.

Tun ranar 25 ga watan Mayun 1998 aka kulla yarjejeniyar amma bangaren Aljeriya bai sanya hannu a kai ba sai yanzu. Yarjejeniyar za ta kara yawan safarar jiragen ruwa da gudanar kasuwanci a tsakanin kasashen biyu.

Tebbun ya kuma ce, jarin kasuwanci tsakanin Turkiyya da Aljeriya na tsakanin dala biliyan 3,5 da 4,2, kuma suna da manufar kara shi zuwa dala biliyan 5.

A wata tattaunawa da Tebbun ya yi da mujallar mako-mako ta Le Point da ke Faransa ya bayyana cewa, 'yan kasuwar Turkiyya sun zuba jarin dala biliyan 5 a kasarsa ba tare da neman wata bukata ta siyasa ba, kuma suna da kyakkyawar dangantaka da Turkawa.

News Source:   ()